بٹگرام: خیبرپختونخوا کے ضلع بٹگرام کے علاقے آلائی پاشتو میں 600 فٹ کی بلندی پر چیئرلفٹ میں پھنسے تمام افراد بشمول بچوں کو 13 گھنٹے بعد باحفاظت ریسکیو کرلیا گیا ہے۔
بٹگرام کے پہاڑی علاقے آلائی پاشتو میں صبح 8 بجے سات بچے اور ایک استاد اسکول جانے کے لیے چئیرلفٹ جسے مقامی زبان میں ڈولی کہا جاتا ہے اس میں سوار ہوئے تاہم راستے میں یہ واقعہ پیش آیا، اس ڈولی کے تین تار تھے جن میں سے دو ٹوٹ چکے تھے اور صرف ایک تار سے چیئر لفٹ ہوا میں ایک تار پر معلق تھی۔
واقعے کی اطلاع ملنے پر امدادی ادارے 1122 اور پاک فوج کی ٹیمیں امدادی کاموں کے لیے وقوعہ پر پہنچیں تاہم کوئی پیشرفت نہیں ہوئی جس کے بعد ایس ایس جی کمانڈوز کے ذریعے پھنسے افراد کو ریسکیو کرنے کی حکمت عملی تیار کی گئی۔
ایس ایس جی کمانڈو کو ہیلی کاپٹر سے رسی کی مدد سے چیئرلفٹ کے پاس بھیجنے کی کوشش کی گئی تو ہوا کے تیز دباؤ کی وجہ سے چیئر لفٹ ہلنے لگی جس کے بعد کھانااور ادویات پہنچائی گئیں۔
پاک فوج کے کمانڈوز نے دو بار کوشش کے بعد اندھیرا ہونے سے قبل آخری بار سلنگ آپریشن کے ذریعے ریسکیو کرنے کا فیصلہ کیا تو اُس میں دو بچوں کو ریسکیو کرنے میں کامیابی ملی۔
اندھیرے اور موسم کی خرابی کی وجہ سے ہیلی کاپٹر آپریشن بند کردیا گیا اور پھر مقامی رضاکاروں بشمول مانسہرہ سے آئے ماہرین نے ریسکیو کا کام جاری رکھا اور تمام پھنسے افراد کو باحفاظت ریسکیو کیا۔
پاک فوج کے شعبہ تعلقات عامہ (آئی ایس پی آر) نے بٹگرام آپریشن کامیابی سے مکمل اور تمام 8 افراد کے باحفاظت ریسکیو کی تصدیق کرتے ہوئے کہا ہے کہ مقامی انتظامیہ اور کیبل آپریٹرز کی مدد بھی اس معاملے میں اہم رہی ہے۔
آئی ایس پی آر کے مطابق بٹگرام میں انتہائی پیچیدہ اور مشکل ریسکیو آپریشن جی او سی ایس ایس جی کی قیادت میں شروع ہوا جس میں چیئرلفٹ میں پھنسے افراد کو باحفاظت ریسکیو کیا گیا۔
ترجمان پاک فوج نے کہا کہ آرمی چیف کی خصوصی ہدایت پر آرمی ایوی ایشن اور ایس ایس جی کی باصلاحیت ٹیم نے ریسکیو آپریشن کا تیزی سے آغاز کیا، پاک فوج کی اسپیشل سروسز گروپ کی سلنگ ٹیم اور پاکستان ائیر فورس کا ہیلی کاپٹر بھی آپریشن میں شامل ہوئے۔
پاک فوج کے اسپیشل سروسز گروپ کی سلنگ ٹیم کو آرمی ایوی ایشن نے مکمل تکنیکی مدد فراہم کی جس کے باعث آپریشن کی کامیابی ممکن ہوسکی، ریسکیو عمل کے دوران پاک فوج اور فضائیہ کے پائلٹس نے بے مثال مہارت اور کارکردگی کا مظاہرہ کیا۔
آئی ایس پی آر کے مطابق ریسکیو آپریشن کو کامیابی سے پایہ تکمیل تک پہنچانے میں لوکل کیبل ایکسپرٹ کی بھی خدمات حاصل کی گئیں، اس انتہائی مشکل اور کٹھن آپریشن میں سول انتظامیہ اور مقامی لوگوں نے بھی بڑھ چڑھ کر حصہ لیا، پاک فوج کے اسپیشل سروسز گروپ کی سلنگ ٹیم، پاک فضائیہ، لوکل انتظامیہ، اور کیبل ایکسپرٹس کی مدد سے پاکستانی تاریخ کے اس منفردآپریشن کو سرانجام دے کر اپنی صلاحیتوں کا لوہا منوایا۔
اعلامیے میں کہا گیا ہے کہ افواجِ پاکستان نے ہمیشہ ہر مشکل وقت میں عوام کی آواز پر لبیک کہا ہے اور آئندہ بھی مشکل کی ہر گھڑی میں عوام کے ساتھ کھڑی ہیں۔
نگراں وزیراعظم انوار الحق کاکڑ نے ریسکیو آپریشن مکمل ہونے اور تمام افراد کی باحفاظت واپسی پر اللہ کا شکر ادا کرتے ہوئے کہا کہ فوج، ریسکیو محکموں، ضلعی انتظامیہ کے ساتھ مقامی لوگوں کے زبردست ٹیم ورک رہا۔
یہ پڑھیں : بٹگرام میں روڈ خراب ہونے کے باعث دو افراد کی جان چلی گئی