مشہور ٹیکنالوجی کمپنی ایپل نے رواں ہفتے آئی فون صارفین کو پیش آنے والے مسائل کے حل سمیت متعدد سیکیورٹی اپ ڈیٹس کا حامل آئی او ایس کا تازہ ترین ورژن 17.1.1 متعارف کرایا ہے۔

ایپل کی جانب سے 17.1.1 کو رواں ہفتے آئی فون 15 کے مخصوص گاڑیوں میں وائر لیس چارجنگ کے استعمال کے دوران ہونے والے مسئلے کے حل کے لیے جاری کیا گیا ہے۔

اپ ڈیٹ سےمتعلق ایپل کا کہنا تھا کہ مخصوص گاڑیوں میں آئی فون 15 ماڈلز وائرلیس چارجنگ کے بعد ایپل پے اور دیگر این ایف سی فیچرز استعمال کے لیے عدم دستیاب ہوسکتے ہیں۔

جاری ہونے والی اس نئی اپ ڈیٹ میں ویدر لاک اسکرین وجٹ کے ساتھ ہونے والے مسئلے کو بھی حل کیا گیا ہے۔

لیکن جہاں اس اپ ڈیٹ نے آئی فون صارفین کے متعدد مسائل حل کیے وہیں صارفین نے اپ ڈیٹ کے بعد شکایات کے انبار لگا دیے ہیں۔

اس اپ ڈیٹ کے بعد کئی صارفین نے آئی او ایس کے نئے ورژن کے متعلق دعویٰ کیا ہے کہ یہ اپ ڈیٹ ان کی ڈیوائس کی بیٹری کو ضائع کر رہی ہے۔

سماجی رابطے کے پلیٹ فارم ایکس (سابقہ ٹوئٹر) پر ایک صارف کا کہنا تھا کہ آئی او ایس 17.1.1 میں بڑا بیٹری لیک ہے۔ تھوڑے سے وقت میں بیٹری 100 فی صد سے 87 فی صد پر آگئی ہے۔

ایک صارف نے لکھاکہ آئی او ایس 17.1.1 اپ ڈیٹ کرنے کے بعد فون گرم ہو رہا ہے اور بیٹری ضائع ہورہی ہے۔

ایک اور صارف کا کہنا تھا کہ آئی او ایس 17.1.1 کی بیٹری لائف خوفناک ہے۔

یہ بھی پڑھیں: ایپل کا اپنے ایئرپوڈز سے متعلق بڑا فیصلہ