فرخ آباد: بھارتی ریاست اتر پردیش کے شہر فرخ آباد میں شادی کے عین وقت دلہن نے شادی سے انکار کردیا۔
واقعہ یوں پیش آیا کہ شادی کرانے والے پنڈت نے پہلے ہی دلہن کے گھروالوں کو دولہا کے مشکوک کردار سے خبردار کردیا تھا، اس کے بعد دلہن نے منڈپ چھوڑ دیا اور اس دوران دونوں خاندانوں کے درمیان بحث اور تلخ کلامی ہوئی۔
اس کے بعد دلہن والوں نے آزمائش کے طور پر دولہے کو دس دس کے 30 نوٹ دیئے اور اسے گننے کو کہا، تاہم 23 سالہ دولہا کئی کوششوں کے باوجود درست گنتی میں ناکام رہا۔ اس کے بعد دولہن والوں نے کہا کہ لڑکا دماغی طور پر بے حد کمزور ہے۔
یہ بھی پڑھیں: عین شادی کے وقت دولہا کی وگ اترگئی، دلہن کا شادی سے انکار
جھگڑا بڑھنے پر پولیس آگئی اور دونوں خاندانوں کے تصفیئے پر اصرار کرتی رہی، تاہم دلہن اور اس کے گھروالوں نے شادی سے یکسر انکار کردیا۔
اس موقع پر دلہن کے بھائی موہت نے بتایا کہ ہم نے بھروسہ کرکے عزیزوں کے مشورے پر کسی تصدیق کے بغیر شادی طے کردی تھی۔ ہمیں لڑکے کی دماغی اور جسمانی حالت پر شک گزرا تو اسے ایک آسان ٹیسٹ سے گزارا جس کے بعد ہماری بہن نے شادی سے انکار کردیا۔