بروتھا: آرمی چیف سید عاصم منیر کا کہنا ہے کہ پاک فوج کے جونیئر لیڈرز نے دنیا بھر میں تربیت، آپریشنز میں اپنا لوہا منوایا، پاک فوج کی پیشہ ورانہ مہارت، قیادت دنیا کی کسی فوج کے مقابلے میں بہترین ہے۔
کثیر الملکی اسپیشل فورسز کی مشترکہ مشق کی افتتاحی تقریب بروتھا میں منعقد ہوئی، مشق میں پاکستان، قازقستان، قطر، ترکیہ اور ازبکستان کی اسپیشل فورسز حصہ لے رہی ہیں۔
آئی ایس پی آر کے مطابق آرمی چیف سید عاصم منیر نے بروتھا گیریژن کا دورہ کیا، آرمی چیف کو جنرل آفیسر کمانڈنگ اسپیشل سروسز گروپ نے بریفنگ دی۔
بریفنگ میں کہا گیا کہ مشق کا مقصد دوست ممالک کے درمیان تاریخی فوجی تعلقات کو مزید بڑھانا ہے، مشق کا مقصد مستقبل کے فوجی تعاون کو بڑھانا ہے اور ایک دوسرے کے تجربات سے استفادہ کرنا ہے۔
یہ بھی پڑھیں: بعض عناصرنے عوام اورفوج کےمقدم رشتے پروارکرنے کی کوشش کی جسے ناکام بنایا:آرمی چیف
آئی ایس پی آر کے مطابق آرمی چیف نے جونیئر لیڈر شپ اکیڈمی شنکیاری کا بھی دورہ کیا۔
آرمی چیف سید عاصم منیر کا کہنا تھا کہ جونیئر لیڈرز پاک آرمی کی ریڑھ کی ہڈی کی حیثیت رکھتے ہیں، جونیئر لیڈر ز روایتی اور غیر روایتی جنگ میں کامیابی سے کلیدی کردار ادا کررہے ہیں۔
ان کا کہنا تھا کہ پاک فوج کے جونیئر لیڈرز نے دنیا بھر میں تربیت، آپریشنز میں اپنا لوہا منوایا، پاک فوج کی پیشہ ورانہ مہارت، قیادت دنیا کی کسی فوج کے مقابلے میں بہترین ہے۔