ایشیاکپ کے فائنل میچ میں سری لنکن بیٹنگ لائن تباہ کرنے والے بھارتی بولر محمد سراج کی عمدہ بولنگ کے چرچے ہر جگہ ہیں کیوں کہ بھارت کو آٹھویں مرتبہ ایشیا کپ چیمپئن بنانے میں محمد سراج نے بہت بڑا کردار ادا کیا اور فائنل کے پلیئر آف دی میچ قرار پائے۔
بھارت کی جانب سے محمد سراج نے تباہ کن بولنگ کرتے ہوئے 21 رنزدے کر 6 وکٹیں لی جس سے سری لنکا کی ٹیم صرف 50 رنز تک محدود ہوگئی جب کہ فائنل میں ہاردک پانڈیا نے 3 کھلاڑی آؤٹ کیے اور ایک وکٹ بمراہ کے حصے میں آئی۔
یہ بھی پڑھیں: لوگ پاکستانی بولنگ اٹیک کی بات کرتے ہیں لیکن یہ بھارت کا اٹیک ہے: سنیل گواسکر
برطانوی خبر رساں ادارے (بی بی سی ) کے مطابق سراج 1994 میں بھارت کے شہر حیدرآباد میں پیدا ہوئے، سراج ایک عام گھرانے سے تعلق رکھتے تھے جن کے والد حیدرآباد کے ایک رکشہ ڈرائیور تھے جب کہ والدہ دوسروں کے گھروں میں کام کرتی تھیں۔
2017 میں آئی پی ایل کی ٹیم سن رائزز نے سراج کی قیمت ڈھائی کروڑ لگا کر انہیں کرکٹ کی دنیا میں نئے آغاز کا راستہ دکھایا، اس سے قبل سراج 2015 میں رانجی ٹیم کی جانب سے کھیلتے ہوئے پہلے ہی سیزن میں مخالف بیٹسمینوں پر اپنی دھاک بٹھا چکے تھے۔
یہ بھی پڑھیں: ایشیا کپ فائنل: بھارت نے آٹھویں بار ٹائٹل اپنے نام کرلیا
آئی پی ایل کے بعد بھارت کی نیوزی لینڈ کے خلاف ٹی ٹوئنٹی سیریز میں محمد سراج نے ٹی ٹوئنٹی ڈیبیو کیا اور پھر 2019 میں آسٹریلیا کے خلاف ون ڈے اور اگلے ہی برس آسٹریلیا کے ہی خلاف اپنا ٹیسٹ ڈیبیو کیا۔
اب ایشیا کپ 2023 کے فائنل میں محمد سراج نے شاندار کارکردگی دکھا کر اپنی دھاک بٹھادی۔