ٹوکیو: جاپان میں گہرے سبزے اور کھیتوں کے عین نیچے ایک بہت بڑی لائبریری بنائی گئی ہے جو ایک جانب علم اور دوسری جانب ماحول دوستی کا عظیم شاہکار ہے۔
اسے ’زیرِ زمین لائبریری‘ کا نام دیا گیا ہے جو تعمیراتی ڈیزائنر ہیروشی ناکامورا کی تخلیق بھی ہے۔ شیبا نامی جاپانی شہر میں قائم یہ لائبریری ماحول دوست کھیتوں میں تعمیر کی گئی ہے، اس کا مقصد یہ ہے کہ کتب بینی کرنے والے لوگ فطرت سے ہم آہنگ ہوکر پر سکون ماحول میں مطالعہ کر سکیں۔
زیرِ زمین لائبریری کی چھت پر کھاد اور مٹی موجود ہے جہاں بکثرت پودے اور درخت موجود ہیں۔ کھیتوں کی مالک کمپنی کرکو فیلڈز کی انتظامیہ نے کہا کہ جس طرح پودے اور شجر مٹی کے خردنامیوں کے ساتھ ملکر رہتے ہیں عین اسی طرح ہم انسانوں کو کھیتوں کے زیرِ زمین جاکر علم حاصل کرنا چاہیئے اور اپنے تخیل کو اونچی اڑان پر لے جانا ضروری ہے۔
لائبریری میں جانے کے لیے زمینی سبزے اور کھیتوں سے گزرنا پڑتا ہے اور آگے اچانک غار نما راستہ نمودار ہوتا ہے۔ اندر بل کھاتے راستے ہیں جہاں علم کے پیاسے گزرتے ہوئے دھیرے دھیرے ماحول سے آشنا ہوجاتے ہیں۔ اب یہاں فرش سے چھت تک کتابوں کے بڑے شیلف رکھے ہیں اور مطالعے کے لیے آرام دہ اور کشادہ جگہیں موجود ہیں۔
اندر کا احاطہ زیادہ تر لکڑی سے تعمیر کیا گیا ہے اور اوپر سے سبزہ اور اور سورج کی روشنی دکھائی دیتی ہے۔ یہاں تک کہ سورج کی روشنی لائبریری کے کونے تک پہنچتی ہے۔
اس شاندار لائبریری کا افتتاح گزشتہ مہینے کیا گیا ہے جہاں 50 شعبوں میں 3000 سے زائد کتب موجود ہیں۔
یہ پڑھیں : نصف صدی بعد لائبریری کو کتاب واپس کرنے والی خاتون کا نام گنیز بک میں درج