جی ٹی وی نیٹ ورک
کھیل

بورڈ نے انگلینڈ کے ٹور کو محفوظ قرار دیا تو ضرور جاؤں گا: بابر اعظم

بابر

لاہور: دورۂ انگلینڈ کا فیصلہ بابر اعظم نے مکمل طور پر پی سی بی پر چھوڑ دیا، کہا کہ بورڈ نے ٹور کو محفوظ قرار دیا تو ضرور جاؤں گا،پاکستان نے طویل عرصے ہوم میچز نہ کھیلنے کا تلخ تجربہ کیا، اب کورونا کی وجہ سے تماشائیوں کے بغیر اسٹیڈیمز میں کھیلنا پڑے گا۔

تفصیلات کے مطابق ویڈیو کانفرنس میں بابر اعظم نے کہا کہ دنیا تبدیل ہوگئی تو کرکٹ کھیلنے اور دیکھنے کا ماحول بھی بدلے گا، بہت جلد نئی صورتحال کے تقاضوں کو سمجھنا ہوگا، انگلینڈ میں کورونا وائرس کی وجہ سے کیسز کی تعداد بہت زیادہ ہونے کی وجہ سے وہاں کا سفر کرنے والا کوئی بھی فرد خدشات کا شکار ہوگا۔

بابر اعظم کا کہنا تھا کہ ٹور کی صورت میں مجھ سے زیادہ میری فیملی پریشان ہوگی لیکن اگر پی سی بی حالات کا جائزہ لینے کے بعد سیریز کو محفوظ سمجھتا ہے تو میں ضرور جاؤں گا۔

ایک سوال پر انھوں نے کہا کہ پاکستانی کرکٹرز 2009 سے2019 تک یو اے ای کے خالی میدانوں میں کھیلتے رہے ہیں۔

انھوں نے کہا کہ ہوم سیریز نہ ہونے کی وجہ سے مشکل حالات کے باوجود پاکستان نے آئی سی سی ٹیسٹ رینکنگ میں پہلی پوزیشن حاصل کی، ٹی ٹوئنٹی ورلڈ کپ اور چیمپئنز ٹرافی ٹائٹل اپنے نام کیا، مشکلات کے باوجود کارنامہ سرانجام دینے میں ہماری ٹیم کا کوئی ثانی نہیں، یہ پاکستانی کرکٹ کی خوبی ہے کہ ہمت نہیں ہاری۔

متعلقہ خبریں