اسلام آباد : پیپلز پارٹی رہنماء کا کہنا ہے کہ پاکستان کرپشن پرسیپشن انڈیکس میں 117ویں نمبر پر تھا، پی ٹی آئی دور میں 140ویں نمبر پر پہنچ گیا۔
وفاقی وزیر برائے ماحولیاتی تبدیلی سینیٹر شیری رحمان نے سماجی میڈیا پر جاری بیان میں کہا کہ عالمی ادارے ٹرانسپیرنسی انٹرنیشنل کی کرپشن پرسیپشن انڈیکس رپورٹ 2022 تحریک انصاف کے بیانیہ کے تابوت میں آخری کیل ہے۔
انہوں نے کہا کہ عمران خان اور تحریک انصاف کا کرپشن کے حوالے سے بیانیہ صرف تقریروں اور مشہوری تک محدود تھا۔ ان کے چار سالا دور حکومت میں کرپشن کم نہیں بلکہ مسلسل بڑھتی رہی۔ تحریک انصاف کی حکومت سے پہلے پاکستان کرپشن پرسیپشن انڈیکس میں 117ویں نمبر پر تھا۔
یہ بھی پڑھیں : کرپشن اور منی لانڈرنگ پاکستان جیسے ملکوں کا اہم ترین مسئلہ ہے : فواد چوہدری
ان کا کہنا تھا کہ عمران خان کے اقتدار کے دوران پاکستان 2019 میں 120 ویں، 2020 میں 124ویں اور 2021 میں 140ویں نمبر پر آگیا۔ تحریک انصاف کے بدترین دور اقتدار کی وجہ سے پاکستان اس فہرست میں 140ویں نمبر پر پہنچ گیا۔
وفاقی وزیر نے کہا کہ "صاف چلی شفاف چلی کرپشن سرے عام چلی۔ ان کی کرپشن کی وجہ سے پاکستان کرپشن انڈیکس میں مجموعی طور پر 23 درجے اوپر چلا گیا۔ انہوں نے مخالفین پر جھوٹے کیسز بنائے جبکہ خود میگا کرپشن اسکینڈلز میں ملوث رہے۔
شیری رحمان کا یہ بھی کہنا تھا کہ اب عمران خان دعویٰ کرتا ہے کہ ان کے دور میں کوئی کرپشن اسکینڈل سامنے نہیں آیا۔