اسلام آباد : پاکستان کی مسلح افواج، عسکری قیادت نے ترک زلزلہ متاثرین سے ہمدردی اور تعزیت کا اظہار کیا، بچاؤ اور امدادی سرگرمیوں کیلئے خصوصی دستے روانہ کردیئے گئے ہیں۔
پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور تینوں مسلح افواج کے سربراہان نے ترکیہ میں زلزلہ زدگان سے گہری ہمدردی کا اظہار کیا۔
آرمی چیف جنرل سید عاصم منیر کی ہدایت پر پاک فوج نے دو دستے ترکیہ روانہ کیئے۔ اربن سرچ اینڈ ریسکیو ٹیم میں ماہرین، سراغ رساں کتے، جدید آلات شامل ہیں۔ آرمی ڈاکٹرز، نرسنگ اسٹاف اور ٹیکنیشنز پر مشتمل میڈیکل ٹیم بھی ترکیہ روانہ ہوئی ہے۔
یہ بھی پڑھیں : وزیراعظم کا ترکیہ کے صدر کو فون، زلزلے سے ہونیوالی تباہی پر اظہار افسوس
ترکیہ زلزلہ زدگان کے لیے 30 بستروں پر مشتمل موبائل اسپتال بھی بھیجا گیا ہے، جن میں خیمے، کمبل اور دیگر امدادی اشیاء شامل ہیں۔ امدادی دستے گزشتہ رات پاک فضائیہ کے خصوصی طیارے سے ترکیہ روانہ ہوئے۔
ترجمان کا کہنا تھا کہ بچاؤ اور امدادی سرگرمیاں ترک حکومت، مسلح افواج، سفارتخانہ اسلام آباد سے قریبی رابطے سے آگے بڑھائی جا رہی ہیں۔ پاکستانی معاون دستے ترکیہ زلزلہ زدہ علاقوں میں بچاؤ، امدادی کاموں کی تکمیل تک موجود رہیں گے۔
فوج نے کہا کہ پاکستان کے عوام اور مسلح افواج ترک بھائیوں کے ساتھ کھڑے ہیں۔ ضرورت کی اس گھڑی میں ترک بھائیوں کو ہر ممکن مدد فراہم کریں گے۔