جی ٹی وی نیٹ ورک
بریکنگ نیوز

وفاق کا آئی جی سندھ کلیم امام کو فوری ہٹانے سے انکار

کلیم امام

کراچی : وفاق نے آئی جی سندھ کے تبادلے پر سندھ کو اپنا جواب دے دیا۔ جواب میں کہا گیا ہے کہ فی الحال کلیم امام ہی آئی جی سندھ رہیں گے۔

سندھ حکومت کی جانب سے آئی جی کلیم امام کی خدمات وفاق کے سپرد کرنے کے لیے اسٹیبلشمنٹ ڈویژن کو خط لکھا گیا تھا۔ خط میں کلیم امام کی کارکردگی پر تحفظات کا اظہار کرتے ہوئے نئے آئی جی کے لیے نام بھی تجویز کیے گئے تھے۔

پاکستان تحریک انصاف کے اراکین سندھ اسمبلی نے سندھ حکومت کے آئی جی کے تبدیلی کے فیصلے کو تنقید کا نشانہ بناتے ہوئے اس کے خلاف عدالت جانے کا اعلان کیا تھا۔

یہ بھی پڑھیں : سندھ حکومت اور وفاق میں آئی جی کی تبدیلی پر کوئی اختلاف نہیں : مرتضیٰ وہاب

سندھ کابینہ نے آئی جی پولیس کلیم امام کی خدمات وفاق کے سپرد کرنے کی منظوری بھی دے رکھی ہے۔ اب آئی جی سندھ کی تبدیلی کے معاملے پر اسٹیبلشمنٹ ڈویژن نے سندھ حکومت کے خط کا جواب دے دیا۔

ذرائع کا بتانا ہے کہ اسٹیبلشمنٹ ڈویژن کی جانب سے لکھے گئے جوابی خط میں کہا گیا ہے کہ سندھ حکومت کی درخواست پر غور کر رہے ہیں، لیکن جب تک فیصلہ نہیں ہو جاتا کلیم امام ہی آئی جی سندھ رہیں گے۔

ذرائع کے مطابق وفاقی حکومت کا مؤقف ہے کہ سندھ حکومت آئی جی کے ڈی نوٹیفائی ہونے تک قائم مقام آئی جی نہیں لگا سکتی اور اسٹیبلشمنٹ ڈویژن وزیراعظم کی ہدایت پر فیصلہ کرے گی۔

متعلقہ خبریں