اسلام آباد : پی پی رہنماء کا کہنا ہے کہ عمران خان اپنے ذاتی سیاسی مفادات کیلئے عدم استحکام پیدا کرنے کیلئے سرگرم ہوجاتے ہیں۔ نجات دہندہ بننے کی ناکام کوشش کر رہے ہیں۔
وفاقی وزیر برائے ماحولیاتی تبدیلی سینیٹر شیری رحمان نے سماجی میڈیا پر جاری بیان میں کہا کہ عمران خان نے اپنے دور حکومت میں آئین، جمہوریت اور بنیادی آزادیوں کی دھجیاں اڑائیں۔ اب وہ حقیقی آزادی اور حقیقی جمہوریت کی نام پر سیاست کر رہے ہیں۔
انہوں نے کہا کہ کبھے کہتے ہیں ان کی سیاست نہیں جہاد ہے۔ کبھی کہتے ہیں بلکہ جنگ ہے، عمران خان کی سیاست غیر سنجیدہ اور گمراہ کن ہے۔
یہ بھی پڑھیں : عمران خان کیخلاف فوجداری کارروائی، فرد جرم آج بھی عائد نہ ہوسکی
ان کا کہنا تھا کہ عمران خان اپنے ذاتی سیاسی مفادات کیلئے ملک اور عوام کے مفادات کو قربان کرنے کو تیار ہیں۔ جب بھی ہم معاشی بحران سے نکلنے کے قریب ہوتے ہیں یہ عدم استحکام پیدا کرنے کیلئے سرگرم ہوجاتے ہیں۔
پیپلز پارٹی سینیٹر نے کہا کہ یہ ملک کو قرضوں اور معاشی بحران میں دھکیل کر نجات دہندہ بننے کی ناکام کوشش کر رہے ہیں۔