ممبئی: بھارت کے گلوکار سدھو موسے والا کے قتل کی منصوبہ بندی کے الزام میں گرفتار لارنس بشنوئی نے جیل سے سپر اسٹار سلمان خان کو ایک اور دھمکی دی ہے۔
بھارتی میڈیا کے مطابق لارنس بشنوئی نے مبینہ طور پر دھمکی دیتے ہوئے کہا کہ کالے ہرن کے قتل کے معاملے پر ان کی برادری سلمان خان سے ناراض ہے کیونکہ وہ ہمارے لیے ذلت کا باعث بنے۔
بشنوئی نے اپنے بیان میں کہا کہ کالا ہرن مارنے کے الزام میں سلمان خان کے خلاف مقدمہ درج کیا گیا لیکن انہوں نے معافی نہیں مانگی، اگر وہ اب بھی معافی نہیں مانگتے تو نتائج بھگتنے کے لیے تیار رہیں۔
یہ بھی پڑھیں: گلوکار سدھو موسے والا کا قتل، سلمان خان بھی خطرے کی زد پر
بھارتی میڈیا کے مطابق لارنس بشنوئی نے سلمان پر زور دیا کہ وہ ان کے مذہبی گرو جمبیشور(جمبا جی) کے مندر جائیں اور معافی مانگیں، اگر ہماری برادری انہیں معاف کردے تو میں انہیں کچھ نہیں کہوں گا۔
یہ بھی پڑھیں: سپر اسٹار سلمان خان کے قتل کی پلاننگ کرنے والا گینگ گرفتار
واضح رہے کہ یہ پہلی بار نہیں، اس سے قبل گزشتہ سال بھی اس نے بالی وڈ اداکار کو قتل کرنے کی دھمکی دی تھی۔
لارنس بشنوئی کے مطابق اس کی برادری کالے ہرن کو اپنے مذہبی گرو بھگوان جمبیشور (جمبا جی) کا اوتار سمجھتی ہے لہٰذا عدالت سے اس کیس میں سزا یا بریت سلمان خان کیلئے حتمی فیصلہ نہیں ہوگی، اگر سلمان خان اور ان کے والد سلیم خان جمبا جی مندر میں جاکر سر عام معافی مانگ لیں تو وہ اپنا ارادہ بدل سکتا ہے ورنہ بشنوئی برادری انہیں قتل کردے گی۔