اسلام آباد : پیپلز پارٹی رہنماء کا کہنا ہے کہ 2013 میں دہشتگرد تنظیموں نے پیپلز پارٹی کو انتخابی مہم چلانے نہیں دی، نئی لہر پر پیپلز پارٹی کو شدید خدشات ہیں۔
وفاقی وزیر برائے ماحولیاتی تبدیلی سینیٹر شیری رحمان نے سماجی میڈیا پر جاری بیان میں کہا کہ پشاور میں دل دہلانے والا خودکش حملہ اور دہشتگردی کے بڑھتے واقعات بہت تشویشناک ہیں۔ ہمیں قومی یکجہتی اور نیشنل ایکشن پلان پر عمل کرنا ہوگا۔
انہوں نے کہا کہ دہشتگردی سے مقابلے کیلئے قوم، تمام سیاسی جماعتوں اور ہر شراکت دار کو متحد ہونا ہوگا۔ ملک مزید تقسیم اور دہشتگردی کا متحمل نہیں ہوسکتا۔
یہ بھی پڑھیں : وفاق کی زندگی اور موت کا سوال ہے، سیاسی جماعتیں قومی مذاکرات کریں : رضا ربانی
ان کا کہنا تھا کہ سابق حکومت کی غیر واضع پالیسی کی وجہ سے دہشتگردوں کو دوبارہ منظم ہونے کا موقع ملا۔ اب عمران خان کہہ رہے کہ وہ طالبان کو خیبر پختون خواہ میں دوبارہ آباد کرنا چاہتے تھے۔ اس طرح کے غیر ذمہ دارانہ بیانات سے دہشت گرد تنظیموں میں نرم گوشہ پیدا کرنے کی کوشش کی جا رہی ہے۔
پیپلز پارٹی سینیٹر نے کہا کہ 2013 کے انتخابات میں دہشتگرد تنظیموں نے پیپلز پارٹی کو نشانہ بنایا اور انتخابی مہم چلانے نہیں دی۔ انتخابات سے قبل دہشتگردی کی نئی لہر پر پیپلز پارٹی کو شدید خدشات ہیں۔