لاہور : رپورٹ کے مطابق کارکنوں نے تین واٹر کینن، آٹھ تھانوں کی گاڑیاں، دو پی آر یو کی گاڑیوں کو نقصان پہنچایا۔ ایک بس کو جزوی نقصان اور واٹر ٹینکر کو مکمل طور پر جلا دیا گیا۔
زمان پارک میں عدالتی احکامات پر جانے والی پولیس سے تحریک انصاف کے کارکنوں کی مزاحمت کے دوران ٹریفک سیکٹر میں ہونے والے نقصان کی رپورٹ تیار کرلی گئی ہے۔
پولیس نے رپورٹ آئی جی پنجاب کو بھجوا دی گئی ہے، جس میں بتایا گیا کہ تین واٹر کینن کو نقصان سے ساڑھے 58 لاکھ کا نقصان ہوا۔ 42 لاکھ 50 ہزار مالیت کا واٹر ٹینکر مکمل طور پر جلا دیا گیا۔ تمام گاڑیوں کا ایک کروڑ 10 لاکھ 90 ہزار کا نقصان ہوا۔
یہ بھی پڑھیں : زمان پارک میں بیٹھا شخص کارکنوں کو ریاستی اداروں کیخلاف اکسا رہا ہے: مریم نواز
ٹریفک سیکٹر شادمان میں 8 موٹر سائیکلیں، 125 اور دو اڑھائی سو سی سی بائیکس جلا کر خاکستر کردیں گئیں۔ موٹر سائیکلوں کی مالیت 23 لاکھ روپے تھی۔ وائر لیس سیٹس اور کمیونیکیشن سسٹم کو 35 لاکھ کا نقصان پہنچایا گیا۔
کیمرے، کمپیوٹر سسٹم چھتریاں اور کونز کی مد میں 11 لاکھ کا نقصان ہوا۔ پیٹرول بم کی وجہ سے لگنے والی آگ سے روزنامچے کا تین سالہ ریکارڈ جل گیا۔ ٹکٹنگ کا رجسٹر، ٹریفک قوانین کی خلاف ورزی پر شہریوں سے لئے گئے شناختی کارڈز، رجسٹریشن بکس اور لائسنس بھی نذر آتش ہوگئے۔
جولائی 2020 سے لے کر دسمبر 2022 تک تمام چالان بکس بھی جل کر راکھ بن گئیں۔ 50 سے زائد پولیس افسران و اہلکاروں کو زخمی بھی کیا۔