اسلام آباد : پیشی کے موقع پر توڑ پھوڑ پر توہین عدالت کیس میں عمران خان سے سات اپریل تک جواب طلب کر لیا گیا۔
اسلام آباد ہائی کورٹ میں چیف جسٹس عامر فاروق نے اسسٹنٹ کمشنر کی جانب سے عمران خان کے خلاف توہین عدالت درخواست پر سماعت کی۔ درخواست گزار کے وکیل راجہ رضوان عباسی عدالت کے سامنے پیش ہوئے۔
درخواست میں مؤقف اختیار کیا گیا کہ عدالت کا حکم تھا کہ عمران خان امن و امان کی صورتحال پیدا نہیں کریں گے۔ عمران خان نے عدالتی حکم کی خلاف ورزی کی۔ پی ٹی آئی کارکنان نے پولیس اور جوڈیشل کمپلیکس پر پتھراؤ کیا، جس سے پولیس اہلکار زخمی ہوئے۔
یہ بھی پڑھیں : عمران خان کو نااہل قرار دیا تو آئی ایم ایف کی مدد خطرے میں پڑ سکتی ہے : زلمے خلیل زاد
درخواست کے مطابق پولیس نے عدالتی حکم کے مطابق سیکورٹی انتظامات کیے تھے۔ عمران خان نے 17 مارچ کا عدالت کا ایک حکم بھی نہیں مانا۔ درخواست میں استدعا کی گئی کہ عمران خان کو طلب کرکے قانون کے مطابق کارروائی کی جائے۔
عدالت نے توشہ خانہ فائل گم ہونے والے معاملے کو اس کیس کے ساتھ منسلک کرنے کا حکم دیا اور امن و امان کی صورتحال پیدا کرنے سے متعلق معاملے کی آئی جی اور انتظامیہ سے رپورٹ طلب کرلی۔ عدالت نے عمران خان کو نوٹس جاری کرکے سات اپریل تک جواب طلب کر لیا۔