ملک پھنس گیا، سسٹم ہینگ ہو گیا ہے، یکطرفہ نظام قانون نہیں چلے گا : مصطفیٰ کمال

کراچی : ایم کیو ایم رہنماء کا کہنا ہے کہ پی ٹی آئی کا قصور نہیں نظام چلانے والوں کا قصور ہے، یکطرفہ نظام قانون نہیں چلے گا۔ قانونی نظام چلانے کی طاقت نہیں، تو چھوڑ دیں۔

ایم کیو ایم کے رہنماء مصطفیٰ کمال کلفٹن میں پلاٹوں کی غیر قانونی الاٹمنٹ کے ریفرنس میں پیشی کے بعد میڈیا سے گفتگو میں کہا کہ ملک اس وقت پھنس گیا ہے۔ سسٹم ہینگ ہو گیا ہے۔ یہ نظام نہیں چل سکتا۔ غریبوں کے لئے ہی سارے قانون ہیں۔ طاقت ور کے لیے کوئی قانون نہیں ہے۔

انہوں نے کہا کہ ہم نے بتا دیا ہے حالات کے تناظر میں بدمعاش بنو۔ ملک چلانے والے عمران خان سے اجتماعی معافی مانگیں۔ پی ٹی آئی کا قصور نہیں نظام چلانے والوں کا قصور ہے۔ لوگ مہنگائی سے مر رہے ہیں۔

یہ بھی پڑھیں : پی ٹی آئی اور پنجاب حکومت کے درمیان معاملات طے پاگئے

ان کا کہنا تھا کہ 5 بجے جج صاحب کہہ رہے ہیں آئیے ہم آپ کا انتظار کر رہے ہیں۔ ریاست کو صرف غریبوں کو مارنا آتا ہے۔ لوگ بنگلادیش جارہے ہیں۔ ٹکا بھی اب پاکستانی کرنسی سے اوپر نکل گیا ہے۔

ایم کیو ایم رہنماء نے کہا کہ آج ہم باغ جناح میں جلسہ کر رہے ہیں۔ ہم نے ملک چلانے والوں کو بتانا ہے کہ یکطرفہ نظام قانون نہیں چلے گا۔ آگے کا لائحہ عمل ہم جلسے میں بتائیں گے۔

مصطفیٰ کمال کا کہنا تھا کہ جن لوگوں کو قانونی نظام چلانے کی طاقت نہیں، وہ چھوڑ دیں۔ ملک اس طرح کے اشرافیہ کے ساتھ نہیں چلنا چاہیے۔ ریاست عمران خان سے اجتماعی معافی مانگے اور ریاست ان کے حوالے کردیں۔