لاہور : پی ٹی آئی سربراہ کا کہنا ہے کہ حکومت کو مخالفین کو کچلنے کی فکر ہے، حکومت کو انتخابات کی تاریخ دینا پڑے گی۔
تحریک انصاف کے سربراہ عمران خان سے سابق وزیر اعلیٰ پنجاب چوہدری پرویز الہٰی نے ملاقات کی، جس میں سابق وزیر دفاع پرویز خٹک بھی شریک ہوئے۔
دوران ملاقات سیاسی صورتحال، ملکی معاملات، حکومت کے انتقامی اقدامات، پنجاب اور خیبر پختونخوا کے انتخاب کے حوالے سے بات چیت کی گئی۔
عمران خان نے کہا کہ حکومت کی انتقامی کارروائیوں کے پیچھے کچھ اور لوگ ہیں۔ حکومت کو انتخابات کی تاریخ دینا پڑے گی ورنہ آئین شکنی کی مرتکب ہوگی۔ حکومت الیکشن سے نہیں بھاگ سکتی۔
یہ بھی پڑھیں : شہباز شریف کی دعوت پر عمران خان کی بدتہذیبی سے دھچکا پہنچا : اسحاق ڈار
انہوں نے کہا کہ حکومت کی ناک تلے دوبارہ دہشت گردی ملک میں سر اٹھا رہی ہے۔ حکومت کو امن و امان کی نہیں مخالفین کو کچلنے کی فکر ہے۔
پرویز الہٰی کا کہنا تھا کہ حکومت معیشت کو تباہ کرچکی۔ امن و امان کی صورتحال بھی تیزی سے خراب ہو رہی ہے۔ حکومت گرفتاریاں، مقدمات، چھاپوں کے سائے میں اے پی سی کی دعوت دے رہی ہے۔ شہباز شریف کی شوبازیاں بری طرح ایکسپوز ہو رہی ہیں۔
انہوں نے کہا کہ عمران خان، تحریک انصاف اور اتحادیوں کو کچلنے کا ایجنڈا سرگرم ہے۔ پی ڈی ایم انتقامی کارروائیوں میں ورلڈ ریکارڈ بنانا چاہتی ہے۔ مقدمات سے کوئی خوفزدہ نہیں۔ ڈٹ کر مقابلہ کریں گے۔