جی ٹی وی نیٹ ورک
بریکنگ نیوز

جنوبی کوریا میں انتخابات ہوسکتے ہیں تو رمضان میں عبادات بھی ہوسکتیں ہیں : پیر نور الحق قادری

جنوبی کوریا میں انتخابات

اسلام آباد : پیر نور الحق قادری نے کہا ہے کہ علماء سنجیدگی کا مظاہرہ کریں، جب جنوبی کوریا میں انتخابات ہوسکتے ہیں، تو رمضان میں عبادات، یوم علی، شبینہ محافل سمیت دیگر کا انعقاد منظم طریقے سے ہوسکتا ہے۔

وفاقی وزیر مذہبی امور پیر نور الحق قادری نے سینئر صحافیوں سے گفتگو میں کہا کہ کورونا کی موجودہ صورت حال میں پوری دنیا اس وباء کا شکار ہے، افسوس اس پر یہودی لابی اور ایجنڈے کے طعنے مارے گئے۔ حکومت کی جانب سے جو اقدامات اٹھائے گئے اس کی بنیادی وجہ عوام کی صحت و سلامتی پیش نظر تھی۔

انہوں نے کہا کہ اگر موجودہ صورت حال میں کورونا مریضوں کی تعداد بڑھ گئی تو پھر قابو کرنا مشکل ہوجائیگا۔ علماء کے ساتھ کل کی ملاقات انتہائی اہم ہوگی، امید ہے اتفاق رائے قائم کرلیں گے۔ جید علماء سے ٹیلیفونک رابطے ہوئے ہیں، علما بھی اپنا موقف پیش کریں گے۔

ان کا کہنا تھا کہ ایوان صدر کے بعد وزیراعظم ہاؤس میں بھی ایک ملاقات ہوگی، جس میں وزیراعظم خود علماء سے کچھ امور پر گفتگو کرینگے۔ علماء کے موقف کو یکسر نظر انداز نہیں کرینگے، ڈبلیو ایچ او کے ایس او پیز پر مکمل عملدرآمد کی بھرپور کوشش کررہے ہیں۔

پیر نور الحق قادری نے کہا کہ کل تک بے بنیاد پراپیگنڈا کے ذریعے تبلیغی جماعت اور زائرین کو ٹارگٹ کیا گیا۔ علماء سنجیدگی کا مظاہرہ کریں ایسا نہ ہو پھر مریضوں تعداد بڑھے تو مذہبی طبقے کو ٹارگٹ کیا جائے۔ سارے کام حکومت نے نہیں کرنے، کچھ کام مساجد کی کمیٹیاں اور علماء کے کرنے کے ہیں۔

وزیر مذہبی امور کا کہنا تھا کہ جب جنوبی کوریا میں انتخابات ہوسکتے ہیں، تو رمضان میں عبادات، یوم علی، شبینہ محافل سمیت دیگر کا انعقاد منظم طریقے سے ہوسکتا ہے۔ امید ہے درمیانی راہ نکال کر رمضان المبارک کے تمام پروگرامز کا انعقاد یقینی بنالیں گے۔

متعلقہ خبریں